Մոուրինյոյի Լոնդոն վերադառնալու հավանականությունը նվազում է
Հեղինակ: Admin |
Լոնդոնի "Չելսիի” ղեկավարությունը, որը կիրակի օրը պաշտնանկ արեց Անդրե Վիլաշ-Բոաշին, շարունակում է փնտրել նոր մարզիչ, ով ամռանը պետք է անցնի աշխատանքի:
Բրիտանական Daily Mail պարբերականը, վստահեցնում է, որ Մադրիդի «Ռեալի» գլխավոր մարզիչ Ժոզե Մոուրինյոն արդեն հայտնել է «Չելսիի» ղեկավարությանը, որ Լոնդոն կվերադառնա միայն իր 2 կարեւոր պահանջները կատարելու դեպքում:
Մոուրինյոն ցանկանում է տարեկան 12 մլն ֆունտ ստեռլինգ աշխատավարձ, ինչպես նաեւ «Չելսիում» է ցանկանում տեսնել Կրիշտիանո Ռոնալդուին, ով ներկայումս փայլում է «Ռեալում»: Այն, որ «Չելսին» ի վիճակի է վճարել Մոուրինյոյի պահանջած գումարը, կասկած չի հարուցում, սակայն Ռոնալդուի տեղափոխությունը խիստ անհավանական է, ինչը զգալիորեն նվազեցնում է պորտուգալացի մասնագետի Լոնդոն վերադառնալու հավանականությունը:
Բացի Ժոզե Մոուինյոյից, "Չելսիի” գլխավոր մարզչի պաշտոնին հավակնում են նաեւ Գերմանիայի ազգային հավաքականի գլխավոր մարզիչ Յոախիմ Լյովը եւ իսպանական "Բարսելոնայի” գլխավոր մարզիչ Խոսեպ Գվարդիոլան: Իսկ ահա, "Տոտենհեմի” գլխավոր մարզիչ Հարի Ռեդնապը հստակ նշել է, որ հրաժարվում է աշխատել "Չելսիի” հետ:
Հիշեցնենք, որ մինչեւ մրցաշրջանի ավարտը "Չելսին” գլխավորելու է Վիլաշ-Բոաշի օգնական Ռոբերտո Դի Մատեոն: