Չնայած, որ միավորների տարբերությունը Ռեալից այժմ 6 - ն է, Գվարդիոլան շարունակում է զգույշ խոսել և նշում է, որ մնացած հանդիպումներում հաղթելն ամենևին էլ հեշտ չի լինելու:
Ընդամենը 1 շաբաթի ընթացքում Ռեալից ունեցած միավորների տարբերությունը 10 - ից նվազեց ու հասավ 6 - ի: Բայց իր նախախաղյա մամլո ասուլիսում Գվարդիոլան ասել է. "Մնացած 10 խաղերում հաղթելը հասարակ խնդիր չէ: Մենք մրցելու ենք թիմերի դեմ, որոնք շատ բաների համար են պայքարում: Այս իրավիճակից պատվով դուրս գալու միակ ձևը մեր աշխատանքի վրա կենտրոնանալն է: Կփորձենք մշտապես բարձր մակարդակի խաղ ցուցադրել ու մեր աշխատանքը կատարել": "Ես շարունակում եմ մտածել, որ 6 միավորի տարբերությունը Ռեալից շատ մեծ է հաղթանակի հասնելու համար", - ավելացրել է Բարսայի գլխավոր մարզիչը:
"Իրավիճակը չի փոխվում"
Միաժամանակ Գվարդիոլան վստահում ու հավատում է իր թիմին. "Ես հավատում եմ, որ մենք չենք սխալվի: Կային պահեր, երբ մենք առաջատարից հետ էինք մնում 13 միավորով և պետք է անպայման հաղթեինք: Իրավիճակը ոչնչով չի փոխվում, մենք ամեն դեպքում պետք է հաղթենք": Պեպը գոհ է ընթացիկ մրցաշրջանից. "Գիտենք, որ կատարել ենք մեր պարտականությունները: Պայքարել ենք և փրձել լավ արդյունքներ գրանցել բոլոր խաղադաշտերում: Հենց դա է մեզանից պահանջվում: Այս պահին արդեն 3 տիտղոս ունենք մեր հաշվին այս մրցաշրջանում և կփորձենք ևս մի քանիսը նվաճել":
15 ակումբի սաներ
Առաջիկա խաղում Բարսելոնան լուրջ կորուստներ ունի պաշտպանական գծում, բայց Գվարդիոլան հանգիստ է. "Մոնտոյան հոյակապ եզրային է, իսկ Մունիեսան հարմարվել է նաև եզրային պաշտպանի դիրքին.... Խաղին հայտավորված 19 ֆուտբոլիստներից 15 - ն ակումբի սաներ են: Սա է մեր հաղթաթուղթը: Կփորձենք լավ խաղալ ու հաղթել":
Ծանր մարզադաշտ
Մալյորկան գլխավորել է Իսպանիայում բավական մեծ հարգանք վայելող Խոակին Կապարոսը, ու մասին Պեպն ասել է. "Իր գլխավորած բոլոր թիմերում Կապարոսը թողնում է իր հետքը: Նրա թիմերը ճանաչելի են խաղադաշտում": Գվարդիոլան, ով մրցակցին համարում է "ագրեսիվ, մեծ ձգտումներ ունեցող և դինամիկ թիմ", վերջում հիշեցրել է, որ "Իբերոսթար մարզադաշտը միշտ էլ ծանր է եղել հյուրընկալվող թիմերի համար":